無法刺激消費

一個正常經濟衰退期需時二點五年至三年，何況呢次係金融風暴？去年10月 至今股市只下跌十三個月，短期反彈隨時出現，至於見底？似乎仲太早。以供應管理協會（ISM）指數睇，如高於60點即代表經濟復甦，低於50點代表經濟放 緩，低於40點代表嚴重衰退快嚟到。上周五指數係38.9，喺1982年9月以嚟最低，睇嚟並唔係幾時復甦，而係美國經濟正在迅速惡化。去年美國汽車銷售 共一千七百萬輛，根據《金融時報》估計，每個美國成年人擁有一部車計，年需求亦只有一百五十萬部。點解去年賣咗一千七百萬輛？理由係廉價財務或消費者浪費 造成。美國人平均五年換一部車，去年唔少人未夠四年便換車；今年已搵唔到任何理由換車，引發汽車業大衰退。由於長期生產過剩，點去處理過剩生產力？不但 汽車業及房屋係咁，大部分日用品亦係咁，因此甚至降至零利率亦無法刺激美國消費者再增加消費。喺咁情況下，美國呢次衰退可維持幾耐？相信較 1981／82年及1973／74年更長（甚至把利率降至零）。

二十國財長及央行年會11月8日喺巴西聖保羅開幕，中國人行行長周小川預測，明年中國GDP升幅8％至9％之間。

瑞 銀估計，中國明年GDP增長率只有7.5％（或更少）。政府已計劃增加鐵路項目投資及大量興建低成本住宅，去減慢明年GDP下降速度。中金公司首席經濟學 家哈繼銘估計，明年中國GDP只有7.3％增長率。駐香港麥格理分析員Paul Cavey對明年中國GDP增長率表示極之憂慮，因依家中國GDP增長下滑速度愈嚟愈快，未來六個月似乎無法阻止下滑。渣打銀行中國研究部Stephen Green認為，中國黃金歲月突然停止，估計明年中國GDP增長率只有7.9％。上周中國政府已要求出席秘魯財長急急回國商討對策，估計短期內中國將公 布刺激經濟方案。德國銀行馬俊表示，如果冇刺激方案，明年中國GDP增長率將下滑到只有6％，係極之危險水平。

曹仁超